Author Description

Sima Prémiu Camões, Arménio Vieira, no podia dezê ma na Grite de Kretxeu: "os poemas podem ser assim ou de outro modo/ até ao infinito/ Só que estes/ não importa o sangue ou a seiva que a outros se vai pedir/ são as marcas que o estar no mundo e a dor/ feriram numa certa pedra". Ese pédra feride pa dor de amor, ô mergulhóde na mar de Cupido, podê ser kualker un de nos, na kualker ponte de planéta Térra. Grite de Kretxeu podia ser, tanbê, "Os Loucos Poemas de Amor", móda kes de Oswaldo Osório, ote stilista de palavra, ote kultor y skultor konsagróde de arte de Minerva, na téla de kretxeu, li mesme na Térra, ô de manifestasãu de Cupido, na kualker alkova más distante, de dois ponbinhe apaixonóde. Na ritme de violãu, na konpase de mórna, na fome de justisa ke liberdade, y na gramátika de nos kriole, Hélio Cruz enbalóne ke 50 poémas de amor, tude es de kretxeu ô pa kretxeu. N ka ta duvidá ma un dia, kónde mar de kanal vrá más kalme, y alguns núvens de dezinformsãu, ô rekuza de lavrá ke agua de nos rebera dezaparesê, na orizonte de nos ilhas, Grite de Kretxeu ta uvide na tude kónte de nos Térra, y tanbê na alén fronteira, y Hélio Cruz ta resebê un mereside rekonhesimente, li mesme na nos ilhas y, provavelmente, na térra lonje. Nese altura, N podê stóde n'ote dimensãu. Pur ise, mi ke korpe arrepiá-me, ke kalor d'ese poezia y d'ese skrita kontajiante, N krê dá nha palpite de medalha-galardãu pa distinsãu de nos poéta-vate. Kualker un de propósta ke ta segí, podê sirví: "Rebeira-Grande - Nos Komese; Santa Mónika - Nos Grandéza; Krióla - Nos Rikéza; Monte Kara - Nos Sertéza; Santa Maria - Nos B.Léza; Kriol - Nos Naturéza".