Author Description

<p>Cine, diversidade e redes, un proxecto de pesquisa que finalizou en 2012 e que versou sobre as posibilidades de circulación do cinema en lingua galega precisamente en sociedades onde se asentou a diáspora galega ao longo da historia, dende aquel Real Decreto de 1773 polo que saíron do porto da Coruña, no paquebote Virxe do Rosario, familias enteiras para construír as primeiras cidades na conca do &quot;Río de la Plata&quot;, tróuxonos á man tres cariátides que distinguen o cinema de aquí: a lingua, a terra (coa variante &quot;paisaxe&quot;) e as migracións.</p><p>Con estas doas no fardelo e ao abeiro de dúas efemérides, os cincuenta anos do 1968 como animador do cinema militante e a declaración do 2018 como &quot;Ano europeo do Patrimonio Cultural. Material, Inmaterial e Dixital&quot;, quixemos retomar os vieiros do cinema con capítulos que nos traian o cine de emigración, presente en cada período; que analicen como se filmou a terra e a idea da terra; que traten das diferentes propostas dun cinema nacional-popular; que se fixen na contribución constituínte do cinema militante e amador, amateur, e que nos axuden a lembrar aqueles momentos de debate sobre a lingua nas películas.</p>